Tulungan mo Ako
Topic: Ang Lipunan
Tulungan mo ako, isang batang nasa daan
Iniwan ng magulang, madumi at mabaho,
Walang makain, walang matirhan, at palaboy
Bakit kaya n’ya ako iniwan, kaibigan?

Tulungan mo ako, isang batang nalululong
Sa - ipinagbabawal na gamot – ang libangan
Ito ang aking natutunan, hindi letra
Hindi mga bilang mula sa ‘sang paaralan.

Tulungan mo ako, isang batang nagbebenta
Hindi lamang ng sampaguita, pati na sarili
Sa mga hayok sa laman, nagkalat sa daan
Sinasamantala ang aking murang katawan.

Tulungan mo ako, isang batang magnanakaw
Tanging paraan para mabuhay at tumagal
Sa kalupitan ng tadhana, ng mundo! Tao -
Wala akong alam, mangmang sa lahat ng bagay!

Tulungan mo ako, isang batang pumapatay
Karahasan ay kaibigan mula simula
Kasangga ang diyablo, katoto si kamatayan
Patay na ang buhay na katawan, nagdurusa.

Tulungan mo ako, isang batang nasiraan
Ng bait, ng muwang – palakad-lakad sa daan
Hindi kinaya ang hagupit sa kanyang buhay
Gutom, lutang, mahina, madumi – walang saysay.

Tulungan n’yo kami, mga batang nasa kalye
Nakikiamot ng kaunting pansin at tulong
Nagmamakaawa sa atensyon, sa pag-ibig
Sa kapwa – kami’y mga batang kaawa-awa.

TULONG!