Tulungan mo Ako
Topic: Ang Lipunan
Tulungan mo ako, isang batang nasa daan
Iniwan ng magulang, madumi at mabaho,
Walang makain, walang matirhan, at palaboy
Bakit kaya n’ya ako iniwan, kaibigan?

Tulungan mo ako, isang batang nalululong
Sa - ipinagbabawal na gamot – ang libangan
Ito ang aking natutunan, hindi letra
Hindi mga bilang mula sa ‘sang paaralan.

Tulungan mo ako, isang batang nagbebenta
Hindi lamang ng sampaguita, pati na sarili
Sa mga hayok sa laman, nagkalat sa daan
Sinasamantala ang aking murang katawan.

Tulungan mo ako, isang batang magnanakaw
Tanging paraan para mabuhay at tumagal
Sa kalupitan ng tadhana, ng mundo! Tao -
Wala akong alam, mangmang sa lahat ng bagay!

Tulungan mo ako, isang batang pumapatay
Karahasan ay kaibigan mula simula
Kasangga ang diyablo, katoto si kamatayan
Patay na ang buhay na katawan, nagdurusa.

Tulungan mo ako, isang batang nasiraan
Ng bait, ng muwang – palakad-lakad sa daan
Hindi kinaya ang hagupit sa kanyang buhay
Gutom, lutang, mahina, madumi – walang saysay.

Tulungan n’yo kami, mga batang nasa kalye
Nakikiamot ng kaunting pansin at tulong
Nagmamakaawa sa atensyon, sa pag-ibig
Sa kapwa – kami’y mga batang kaawa-awa.

TULONG!

May Gusto Ka Ba sa Akin
Topic: Para sa Puso
(Tanong ng isang dalaga sa isang torpe)

Aba naman, ano ba yan
Titig ka ng titig dyan
Wala namang masabi
Ikaw ay napipipi

May gusto bang sabihin
Di naman makatingin
Iyan ba ay pag-iwas?
Gusto mo ba ng dahas?

Aba naman, ano ba yan
Parang may kalungkutan
Ayaw na 'kong pansinin
Puso ko'y nabibitin

Sana'y di nadismaya
Kalimutan ang kaba
At itanong mo na rin -
"May gusto ka ba sa akin?"

Huwag ka nang mahiya
Tanggapin ang biyaya
ng matamis na "Oo,
may gusto ako sa 'yo!"

Tanaga Para kay G. David
Topic: Opismeyts
sa WIP ay nakilala
ang sabi ay si Aga
"Aga gising, aga laba?"
Sunny David, siya pala!

sa WIP ay nakilala
si bossing na abala
maraming opisina
Sunny David, siya pala!

sa WIP ay nakilala
‘sang boss na tila bula
e naglaho bigla
nakaalis na pala

sa WIP ay nakilala
ay, isang gwapong mama!
kami may naalala
blow-out mula sa kanya

Mula kay Bing, isang tanaga

uhaw mo ay matitighaw
Fundador nasa mesa
naalala ay ikaw
naku! b-day mo pala

Magaling Daw
Topic: Samu't Sari
Si Kulasa, nakatungtong lang sa Amerika
Ang akala yata nakatungtong na sa ulap
Ang akala yata mga kababayan sa Pinas
Mga taong di nakakaintindi, at mga bobo!

Pinalad si Kulasa na mangibang-bayan
Ngayon e kumikita na ng mga dolyar, big taym!
Hayun at tuloy e sumobra hangin sa ulo,
Pati si Juan de la Cruz e kinalimutan.

Sa mga komentaryo makikilala mo siya
Si Kulasang mayabang, maangas, nagmamaganda
Feeling niya isa siya sa mga magagaling
Sa blogging; ang mga baguhan ay walang sinabi!

Konting paggalang naman, Kulasa, word of advice,
Kahit na sira ulo ay may sariling kwento
sa mundong ito, ‘lam mo, lahat ay patas tayo
Pagkamatay, uod lang ang katapat ng wang-kata mo.

O, hindi na kailangang sabihing magaling ka…
Sasabihin naman iyon ng mga nagbabasa
Intelektwal o hindi ay makikita pa rin
Baka nga ikaw pa ang hindi nakaintindi.

‘Wag init ulo, Kulasa, hinay-hinay lamang
baka mahulog ang peluka, mawala porma
at masabing taga-Pinas ka, sayang di ba?
Eto lang aking masasabi – Fish tayo!?? he he

Dumi sa Mukha
Topic: Si Ako
Dumi sa mukha nakita
Sa itaas ng labi n’ya
Yun pala’y isa nang sugat
Dahil sa dagta ng mangga.

"Sugat, hindi ‘to kulangot!"
Sasabihin na sana niya
Sa mamang titig nang titig
Hindi dahil sa paghanga.

Dumi sa mukha napansin
Ng kasamang naghisterya,
"Ay, ano ba, ‘yan?"
Na kasama na ang arte.

Di inakalang ang sugat
Makakabawas din pala
Ng kumpiyansa sa sarili –
Gusto nang magtago t’wina.

Paano ay tumubo pa
Sa parteng bilad sa mata
Sana ay sa pu-wet na lang
Kahit saang tago sana!

Dumi, sugat at iba pa
Maliit man o malaki
Ang mapapansin kaagad
At hindi ang kabuuan…

Daing ng Isang Anak
Topic: Pamilya
"Ma, tama na po!" pagmamakaawa ng isang anak
habang nakaluhod sa mga butil ng asin
sumusugat sa kanyang mga tuhod, sa kanyang puso
"Mahal ba ako ng Mama ko?" daing sa puso.

"Pak!" sampal na matunog sa murang pisngi
Dahil hindi tumigil sa paghikbi
Dahil gutom sumisigaw, humpak ang tiyan
"Bakit hindi ako pansin, ako’y gutom."

”Nangangatal sa takot, impit na pag-iyak
Galit na galit ang ina sa palakol na grado
Sampal kaliwa’t kanan muli sa murang pisngi
“Bakit ako ginaganito? Anim na taon pa lang ako.”

Dugong mapakla sa labi ng paslit
Isa lamang sa mga parusa ng malupit
Nadupilas sa lakas ng hampas
Di kaya kabal na ang murang katawan?

“Ayoko na po! Ayoko na po!”
Daing na tahimik ng lumuluhang bata
Sa tindi ng takot, hindi paggalang
Pilit na lamang tumitigil sa pag-iyak.

Hindi na yata natatandaan ang nakaraan
Ng inang malupit na dati’y isa ring paslit
Na higit na katampalasan ang ginawa
Sa ina niya at sa mga kapatid.

Hindi na yata natuto sa pait
Na dinanas mula sa kahirapan
Nais pa yatang ipatikim sa paslit
Ang mas matindi, ang mas malupit.

Daing ng anak mo, hindi mo ba naririnig
Hindi maisatinig dahil sa pangamba
Dahil sa kamay na bakal
Na minana sa asawang mong pusakal.

Ayaw mong makinig sa payo ng iba
Na ang anak ay minamahal, kinakalinga,
Inaaruga, pinayayabong, iniingatan
Ang pagmamaltrato ay iniiwan.

Bigkis ng pagmamahal, nasaan
Sigurado ba na ang pedestal
Na tinitingala, na sinasamba,
Nagmamalasakit nang tunay?

Maaga pa, sana’y huwag datnan
Ng takipsilim ang kalupitan
Na siyang magdudulot sa lahat
Ng lumbay, kapighatian.

Hindi ang ina ang dapat magbigay
Ng karahasan, ng di pag-unawa,
Hindi ang anak ang dapat umunawa
Sa mga kakulangan ng isang ina.

Salamat, Mr. Hilao
Topic: Opismeyts
SALAMAT…

Sa mga araw na ikaw ay nariyan
Kung kami ay may alalahanin
Sa mga oras ng kasayahan
Kahit na kami ay may suliranin.

SALAMAT…
Sa mga sandaling ikaw ay kahati
Sa lungkot at saya, ika’y kapiling
Sa mga sandali ng pagbubunyi
Ang iyong pagtawa’y mataginting.

SALAMAT…
Sa mga panahong tayo’y nagkasama
At ibinigay ang iyong kabutihan
Sa mga panahong nagpadama
Sa amin ng tunay na kagalakan.

Alin ang Mas Mabigat
Topic: Para sa Kaluluwa
timbangin mo
grasyang sa yo
ibinigay

timbangin mo
pagsubok na
dumadaan

mas mabigat
ba, biyaya
o pagsubok?

mali ka kung
para sa’yo
ay pagsubok!

sa tuwina
tayong lahat
pinagpala

inihinga
n’ya sa atin
ang sa Kanya

Ang Puso Daw
Topic: Para sa Puso
Tumitibok daw ang puso
ngunit para kangino?
Para nga ba sa iyo?
Ako'y nalilito
Dapat nga bang
ako'y maging ganito?
Labis akong nasasaktan
Puso'y nagdaramdam
Mahal mo nga ba ako?
Ako'y nalilito...
Ako'y nagdaramdam
Alin ba ang totoo?
Mahal kitang totoo.
Mahal mo nga ba ako?
Hanggang saan ba ito?
Anong hangganan meron?
Kung iya'y totoo
Ba't nagmamahal pa rin sa iyo?

Nakalimutang Magpasalamat Pero Naalala
Topic: Kaibigan
(Para kay Batjay)

Sa pagtalon-talon
Sa mga blogs sa i-net
Nagawi sa blog nya
Kabilang pala siya
Sa blog ni Ka Rolly

Kwentong tambay nga ba?
Kala ko walang wenta
Kabaligtaran
Pala, pahiya pa
Ayun! Humanga na

Salamat nang many
Pagpapaunlak mo
It’s an honor to me!
Nalimutan nga ang“TY”
pero naalala

Better late than never, di ba?