Topic: Pamilya
"Ma, tama na po!" pagmamakaawa ng isang anak
habang nakaluhod sa mga butil ng asin
sumusugat sa kanyang mga tuhod, sa kanyang puso
"Mahal ba ako ng Mama ko?" daing sa puso.
"Pak!" sampal na matunog sa murang pisngi
Dahil hindi tumigil sa paghikbi
Dahil gutom sumisigaw, humpak ang tiyan
"Bakit hindi ako pansin, ako’y gutom."
”Nangangatal sa takot, impit na pag-iyak
Galit na galit ang ina sa palakol na grado
Sampal kaliwa’t kanan muli sa murang pisngi
“Bakit ako ginaganito? Anim na taon pa lang ako.”
Dugong mapakla sa labi ng paslit
Isa lamang sa mga parusa ng malupit
Nadupilas sa lakas ng hampas
Di kaya kabal na ang murang katawan?
“Ayoko na po! Ayoko na po!”
Daing na tahimik ng lumuluhang bata
Sa tindi ng takot, hindi paggalang
Pilit na lamang tumitigil sa pag-iyak.
Hindi na yata natatandaan ang nakaraan
Ng inang malupit na dati’y isa ring paslit
Na higit na katampalasan ang ginawa
Sa ina niya at sa mga kapatid.
Hindi na yata natuto sa pait
Na dinanas mula sa kahirapan
Nais pa yatang ipatikim sa paslit
Ang mas matindi, ang mas malupit.
Daing ng anak mo, hindi mo ba naririnig
Hindi maisatinig dahil sa pangamba
Dahil sa kamay na bakal
Na minana sa asawang mong pusakal.
Ayaw mong makinig sa payo ng iba
Na ang anak ay minamahal, kinakalinga,
Inaaruga, pinayayabong, iniingatan
Ang pagmamaltrato ay iniiwan.
Bigkis ng pagmamahal, nasaan
Sigurado ba na ang pedestal
Na tinitingala, na sinasamba,
Nagmamalasakit nang tunay?
Maaga pa, sana’y huwag datnan
Ng takipsilim ang kalupitan
Na siyang magdudulot sa lahat
Ng lumbay, kapighatian.
Hindi ang ina ang dapat magbigay
Ng karahasan, ng di pag-unawa,
Hindi ang anak ang dapat umunawa
Sa mga kakulangan ng isang ina.
Posted by bingskee
at 12:01 AM
Updated: Friday, 22 July 2005 9:08 PM
